بنشكر ربنا جدا علشان الفترة دي فترة مليانة بأنشطة وفرص لتقديم كلمة الرب، ومحتاجين صلواتكم!
معرض القاهرة الدولي للكتاب يبدأ النهاردة لحد 3 فبراير 2026: السنة اللي فاتت كان فيه إقبال غير عادي على المعرض وكان عدد الزائرين أكتر من خمسة ونصف مليون زائر!
ونشكر ربنا إحنا السنة دي عندنا منتجات جديدة كتير، ومتحمسين جدًا بشكل خاص لـ كتاب مقدس جديد للأسرة “100 خطوة - قصص من الكتاب المقدس للعائلة”، وهو كتاب قيم وهيكون بسعر مدعم ومتصمم بطريقة شيقة مخصوص علشان يساعد العائلات تقرأ كلمة ربنا مع أولادهم وبناتهم، ويثبتوا في الإيمان ويكبروا روحيًا.
وكالعادة زي كل سنة، هيكون عندنا 3 مسابقات رقمية كل يوم على تطبيق الكتاب المقدس "كلامك نوري"، وهنقدم كوبونات خصم على منتجاتنا للفائزين. وكمان هيكون عندنا شاشات تاتش كبيرة في جناحنا عليها مسابقات مباشرة داخل المعرض علشان نشجع الناس تتفاعل مع الكتاب المقدس وتواظب على قراءته. اضغط هنا علشان تشوف صور وتعليقات من زوار السنين اللي فاتت.
صلوا معانا من أجل المعرض علشان كلمة ربنا توصل للناس بأشكال مختلفة، وان بذور الكلمة تنمو وتأتى بثمر كثير.
وكمان بمناسبة إجازة نص السنة، عندنا أنشطة تانية كتير: جولات عالم الكتاب المتنقل، ومسابقات الكتاب المقدس للأعمار المختلفة، ومؤتمرات تدريب لدرس الكتاب المقدس.
الفترة دي كمان بنوزع أخر كمية من شنطة الكريسماس، نشكر ربنا لان الآباء الكهنة وخدام مدارس الأحد فرحانين جدا بتوزيع الشنطة دي وبيبعتوا رسائل شكر من اجل المنتجات القيمة اللى فى الشنطة خصوصًا الكتاب المقدس المصور وكتب القصص اللي بتساعد الأطفال يفهموا كلمة ربنا ويتفاعلوا معاها.
بنطلب منكم صلواتكم لكل خدام الدار اللى بيتعبوا خلال الأسبوعين الجايين دول، لأن الانشطة دي بتحتاج مجهود كبير جدا.
مرة تانية بنشكركم جدا لأن ليكم دور كبير في كل مشروع ونشاط بنقوم به. شكرًا على صلواتكم، وشكرا على دعمكم لخدمة كلمة ربنا في مصر.
