قلبنا مليان بالشكر لربنا لأجل فرصة تواجد دارالكتاب المقدس بالمعرض الدولي للكتاب فى الفترة من 24 يناير الى 4 فبراير 2025. زار المعرض الدولي حوالي 5 ونص مليون زائر. وكانت فترة مليانة بالزيارات المشجعة من زائرين عندهم شغف وأشواق وأسئلة لفهم الحق ولشراء الكتاب المقدس. احنا بنشكركم جدًا على صلواتكم اللي فعلا شفنا استجابتها.
من أجمل المفاجأت اللى كانت السنة دي هى الشعار الرسمي للمعرض: "أقرأ ... فى البدء كان الكلمة". كانت حاجة رائعة أننا نشوف كلمة ربنا مكتوبة ومنتشرة فى كل أرض المعرض .
كمان من المشجع أن ربنا اكرمنا بمكانين عرض متميزين. الأماكن بيتم اختيارها عن طريق قرعة لكل الناشرين. ونشكر ربنا أن مكان العرض الأول كان عند مدخل الصالة الرئيسية ومكان العرض التاني كان جنب اكبر دور نشر متخصصة فى الكتب المدرسية و ده سهل جدًا وصول ألاف الزوار لنا.
من المنتجات الجميلة اللى تم عرضها السنة دي كتاب "أعظم كتاب"وهو كتاب بيجاوب على تساؤلات كتيرة بخصوص صحة الكتاب المقدس. فى البداية كان عندنا تخوف أن الكتاب ده ممكن يسبب مناقشات جدلية ولكن لدهشتنا كان استقبال الناس للكتاب ايجابي جدا وكتير من الزوار قالوا لنا " أنا محتاج جدا الكتاب ده" أو "أنا محتاج اقدم الكتاب ده لصديق لي". نشكر ربنا أننا قدرنا نوزع أكتر من 4000 نسخة خلال المعرض.
كمان بنشكر ربنا أننا اصدرنا انجيل مرقس مصور بالعامية المصرية. وبنشكر ربنا أن ده هيساعد ناس كتير تفهم الإنجيل بلغة بسيطة و كمان دقيقة جدًا.
زي كل سنة، كان هدفنا نوفر الكتاب المقدس والعهد الجديد بأسعار في متناول الجميع، وكان عندنا مجموعة كبيرة من الكتب بأسعار مدعمة. من أكتر اللحظات اللي أثرت فينا، لما زارت المعرض سيدة وشافت العهد الجديد اللي كنا عارضينه بسعر 6 جنيه بس، ومسكت النسخة وابتسمت وقالت: "أنا اشتريت الكتاب ده من سنين لما كان بجنيه واحد بس! وسافرت بي لبلدي وقريته كذا مرة لحد ما أمي اخدته مني ورمته... لكن حياتي اتغيرت بسبب الكتاب ده. والسنة دي، جبت صاحبتي معايا، علشان اساعدها تجيب هى كمان الكتاب المقدس."
مواقف زي دي بتفكرنا بهدف تواجدنا فى المعرض!
من المنتجات التانية الجميلة واللى تم إخراجها وطباعتها بشكل جذاب هو كتاب "حياة المسيح" وهو بيتكون من أجزاء من الأناجيل بتوضح إلوهية المسيح وتعاليمه وامثاله ومعجزاته وموته وقيامته. الكتاب ده كان متوفر بخمسة جنيه فقط واشتراه حوالي 7 الاف شخص.
حوالى 3600 شخص أشتركوا فى حل مسابقات في الكتاب المقدس خلال اسبوعين المعرض إما بالحضور او اونلاين. شارك الآلاف من مختلف الأعمار والخلفيات فى المسابقة الموجودة على شاشات كبيرة في جناح الدار. كانت المسابقة عبارة عن ترتيب كلمات لآيات كتابية محبوبة أو ربط شخصيات كتابية بأفعال لهم أو الغاز. أضافت المسابقات جو من المرح والبهجة واحنا بنشوف الأسرة كلها متجمعة علشان تحل أسئلة كتابية.
لاحظت نانسي (من فريق الدار) أنه فيه بنت واقفة مترددة من بعيد، نفسها تحل المسابقة وتاخذ جايزة بس خايفة ماتعرفش لأن عمرها ما قرأت الكتاب المقدس. لكن نانسي شجعتها تجرب وساعدتها تفهم القصص وتحل المسابقة صح، ولما خلصت كسبت كتاب قصص مصورة للاطفال. بعد وقت قليل جت البنت ومعاها كل اصحابها علشان يحلوا المسابقة ويخدوا الهدايا.
كان ركن الخط العربى من الحاجات الجميلة اللى الناس بتستناها. وكعادة كل سنة أيمن (من فريق الدار) شارك بكتابة 750 آية بخطه الجميل للزوار. بدأ أيمن الفكرة دي من 6 سنوات ولسه الناس مستمرة تيجى كل سنة علشان تطلب منه يكتب لهم آية معينة. واحد من الزوار صور لنا مدخل بيته مزين بكل الآيات اللى كتبها ايمن له.
فى نهاية كل معرض بنيجي نقدم شكر عميق لربنا اللى فعلا باركنا جدًا وأعطانا فرصة عظيمة لتقديم الكتاب لناس كثيرة مشتاقة تعرف الحق. احنا بنشكركم جدًا لمحبتكم ولصلواتكم ولدعمكم المستمر لخدمة كلمة الله. "هكذا تكونُ كلِمَتي الّتي تخرُجُ مِنْ فمي. لا ترجِعُ إلَيَّ فارِغَةً، بل تعمَلُ ما سُرِرتُ بهِ وتَنجَحُ في ما أرسَلتُها لهُ." إشعياء 11:55
