مايو 2023

بانوراما عالم الكتاب للأطفال اللي موجود في المقر الرئيسي لدار الكتاب المقدس بالقاهرة خدم عشرات الآلاف من الأطفال خلال العشرين سنة اللي فاتوا وغرس فيهم الثقة في أن الكتاب المقدس هو كلام ربنا. لكن كان عندنا دايما اشتياق إننا نخدم الأطفال اللي صعب عليهم يسافروا من بلادهم وقراهم البعيدة عن القاهرة، وفضلنا سنين بنحلم بعالم كتاب متنقل يوصل لحد عندهم.

ومع بداية 2023 الحلم أصبح حقيقة، وبقى عندنا عالم الكتاب المتنقل في شكل جذاب جداً للأطفال،  ونجح فريق دار الكتاب المقدس إنهم يخلوا رحلة عالم الكتاب شيقة جداً في مغامرة مع شخصية كرتونية "القبطان طواف".

الرحلة  حوالي 50 دقيقة ومليانة تفاعل وحركة علشان الاطفال يتعلموا عن الكتاب المقدس بشكل تفاعلي يثبّت في عقلهم المعلومات ويعرفوا من خلال جولات في 5 خيام مختلفة عن إزاي الكتاب المقدس اتكتب؟ ومين كتبه؟ واتكتب في وقت اد إيه؟ إزاي كان بيتم نسخه بكل دقة بأدوات بسيطة؟ إزاي اترجم للغات كتيرة وكمان مخطوطاته الكتيرة اللي بتأكد إن الكتاب اللي في ايدينا هو هو الكتاب اللي اتكتب من آلاف السنين. وإنهم هما كمان عليهم دور مهم إنهم يقروا الكتاب كل يوم ويكلموا أصحابهم عنه كمان.

وفي أول شهرين بس قدرنا نخدم أكتر من 15 ألف طفل في 3 اماكن مختلفة في الصعيد وشفنا إزاي الأولاد منبهرين وفرحانين بكلمة ربنا. وعلشان معظم الجولات بتكون في مراكز وقرى فقيرة فالأطفال بيحضروا الجولات بأسعار رمزية جداً.

بنشكر ربنا جداً على تشجيع قيادات الكنيسة لينا إننا نعمل عالم الكتاب المتنقل عندهم. وكمان بنشكر ربنا على فريق دار الكتاب الرائع اللى استغلوا كل مواهبهم  في التنظيم والتمثيل والقيادة لنجاح عالم الكتاب وعملهم لساعات طويلة  بكل فرح وحماس ومحبة للأطفال.  

بنصلي إننا نقدر نخدم عشرات الآلاف من الأطفال السنة دي وعايزينكم تشاركونا الصلاة من أجل فريق العمل والأطفال وكمان تشاركونا الدعم علشان نقدر نخدم كل الأطفال في كل مكان في مصر.  حلمنا نخدم الصيف ده 70 ألف طفل والطفل بيكلف حوالي 22 جنيه. ومتأكدين أن إلهنا السخي هيدبر من خلال محبتكم وسخاءكم كل التكلفة لخدمة أطفالنا.

مع خالص شكرنا لمحبتكم ودعمكم لرسالة دار الكتاب المقدس في مصر.


أمير إلهامي
المدير العام