|
أغسطس 2024
"ماذا نرد للرب من أجل احسانه"
بعد مرور اكتر من 6 شهور من 2024، بنقدم لإلهنا الشكر والحمد على كل إحساناته معانا فى خدمة الكتاب المقدس. فبالرغم من حرارة الجو الشديدة والظروف الاقتصادية الصعبة الا ان الله بارك عمل دار الكتاب المقدس وقدرنا بمعونة الرب نكمل فى كل برامج الدار المختلفة.
نشكر الله جدًا من أجل أنشطة الصيف ده بداية من "عالم الكتاب المتنقل" واللى بيأكد للأطفال مصداقية الكتاب المقدس، وكمان "احتفالات كينجو"، ومسابقة "فكرة X لعبة" اللى فيه مسابقات كتابية السنة دي في سفر أعمال الرسل.
|
واحدة من الامهات شاركتنا عن تأثير كتاب المسابقات على حياتها وازاى انها كانت مش بتعرف حاجة عن الكتاب المقدس ولا محبة الله ليها. لكن لما ابتدت تحل المسابقات، بقت تقرأ الكتاب المقدس بشغف لدرجة أنها بتخلص شغل البيت بأسرع ما يمكن علشان تقضى اطول وقت تقرأ وتدرس فى الكتاب المقدس وتحل المسابقات. مش بس كده اوقات كانت تسهر للساعة 3 او 4 الفجر وهى بتقرأ فى الكتاب. دراستها للكتاب عملوا تغيير كبير فى علاقتها بالله وبافراد اسرتها. 
بدموع كتيرة ودعت أسرة دار الكتاب المقدس في أول يوليو الاخ العزيز أمير حنا فرج اللي خدم في الدار 26 سنة. امير كان شخص تقي محب و متواضع جدًا ومجتهد فى عمله وخدمته. أمير شارك فى خدمة توزيع الكتاب المقدس في الاحتفالات الكنسية والمعارض والكنايس والمكتبات العامة وكان بيشجع ناس كتير تدعم خدمة الدار. مفتقدين جدًا وجود أمير بيننا لكن اللي بيعزينا أنه مع الرب وارتاح من كل آلامه وامراضه. صلوا معانا من اجل زوجته نانسى واولاده يوسف ورافى.